అబ్బా.. ఈ ఒత్తిడి భరించలేకపోతున్నాను... ఎవరి నోట విన్నా ఈ మాట రాకుండా ఉండదు. ఇలా ఎప్పుడు చూసినా బిజీ బిజీ.. పని ఒత్తిడితో సతమతం అవుతున్నామని బాధపడేవాళ్లకు ఒత్తిడి నుంచి బయటపడటానికి కొన్ని సూచనలు...
- ప్రతిరోజు చేయాల్సిన పనులకు సంబంధించి ప్రణాళిక తయారుచేసుకోవాలి. ఏ పనికి ఎంత సమయం కేటాయించాలనే విషయాన్ని గుర్తుపెట్టుకోవాలి. మరుసటి రోజు చేయాల్సిన పనులను కూడా రాసుకోవాలి. అందులో ముఖ్యమైన పనికి మొదటి ప్రాధాన్యత ఇవ్వాలి. ప్రతిరోజు పని ముగిసిన తరువాత ఒకసారి చెక్ చేసుకోవాలి. అవసరానికి తగినట్టుగా మార్పులు చేసుకోవాలి.
- గత అనుభవాలను ఒకసారి పరిశీలించాలి. గతంలో ఎదురయిన ఇబ్బందులను ఒకసారి గుర్తుకుతెచ్చుకుంటే అదే పరిస్థితి మళ్లీ ఎదురయితే సులభంగా అధిగమించవచ్చు.
- కొందరు ఒత్తిడిలో కూడా బాగా పనిచేయగలుగుతారు. మరికొందరు కొంచెం ఒత్తిడి ఉన్నా పని పూర్తి చేయడానికి ఎక్కువ సమయం తీసుకుంటారు. అటువంటి వారు సెల్ఫ్ మోటివేషన్ అలవాటు చేసుకోవాలి.
- ఒత్తిడిని తగ్గించడానికి మసాజ్, మెడిటేషన్ వంటి రిలాక్సేషన్ టెక్నిక్స్ బాగా ఉపయోగపడతాయి. మసాజ్ వల్ల నిద్ర బాగా పడుతుంది. తద్వారా రోజంతా ఉత్సాహంగా పనిచేయగలుగుతారు.
- వ్యాయామం చేయడం వల్ల రక్తప్రసరణ మెరుగుపడుతుంది. అధిక బరువు తగ్గుతారు. ఆరోగ్యంగా ఉంటే పనిలో ఆటంకం ఉండదు.
సామాజిక సేవ చేయడం అలవర్చుకోవాలి. వారంలో ఒకరోజు ఏదైనా స్వచ్ఛంద సంస్థలో సేవ అందించాలి. దీనివల్ల ఒత్తిడి నుంచి బయటపడతారు.
రోజూ తగినంత నీరు తాగాలి. నీరు తక్కువగా తీసుకుంటే శరీరం డీహైడ్రేషన్‌కు గురవుతుంది. ఇది ఒత్తిడికి కారణమవుతుంది.
