సండే వచ్చినా, ఇంట్లో ఏదైనా చిన్న ఫంక్షన్ జరిగినా, లేదా అనుకోకుండా ఇంటికి బంధువులు వచ్చినా.. ముందుగా గుర్తొచ్చే స్పెషల్ రైస్ ఐటమ్ 'బగారా అన్నం'. నాన్-వెజ్ కర్రీస్ లోకైనా, వెజ్ కుర్మాలోకైనా బగారా రైస్ కాంబినేషన్ అద్భుతంగా ఉంటుంది.
సాధారణంగా గిన్నెలో వండితే కొంచెం ఎక్కువ సమయం పడుతుంది కదా.. అందుకే అప్పటికప్పుడు కుక్కర్లో కేవలం 10 నిమిషాల్లో, అన్నం ముద్దగా అవ్వకుండా పొడిపొడిగా, కమ్మటి సువాసనతో బగారా అన్నం ఎలా వండాలో పక్కా కొలతలతో ఇప్పుడు తెలుసుకుందాం.
బాస్మతి బియ్యం (లేదా సోనా మసూరి): 2 కప్పులు (అరగంట ముందు నానబెట్టుకోవాలి)
ఉల్లిపాయ: 1 పెద్దది (పొడవుగా కట్ చేసుకోవాలి)
పచ్చిమిర్చి: 4-5 (పొడవుగా చీలికలు చేసుకోవాలి)
పుదీనా: 1 కట్ట (శుభ్రం చేసిన ఆకులు)
కొత్తిమీర: కొద్దిగా (సన్నగా తరిగినది)
అల్లం వెల్లుల్లి పేస్ట్: 1 టేబుల్ స్పూన్ (తాజాగా దంచినది అయితే మంచిది)
నెయ్యి: 2 టేబుల్ స్పూన్లు
నూనె: 2 టేబుల్ స్పూన్లు
బిర్యానీ ఆకు: 2
షాజీరా: 1 టీస్పూన్
లవంగాలు: 4
యాలకులు: 3
దాల్చిన చెక్క: 1 అంగుళం ముక్క
అనాస పువ్వు (Star anise): 1
ఉప్పు: రుచికి సరిపడా
నీళ్లు: బియ్యం రకాన్ని బట్టి (2 కప్పుల బాస్మతికి 3 కప్పుల నీళ్లు పడతాయి)
ముందుగా బియ్యాన్ని రెండు సార్లు శుభ్రంగా కడిగి, తగినన్ని నీళ్లు పోసి అరగంట పాటు నానబెట్టుకోవాలి. ఇలా చేస్తే అన్నం పొడవుగా, పొడిపొడిగా వస్తుంది.
ఇప్పుడు స్టవ్ ఆన్ చేసి ప్రెషర్ కుక్కర్ పెట్టుకుని.. అందులో 2 టేబుల్ స్పూన్ల నూనె, 2 టేబుల్ స్పూన్ల నెయ్యి వేసి వేడి చేయాలి. నెయ్యి వేయడం వల్ల బగారా అన్నానికి మంచి రుచి, సువాసన వస్తాయి.
నూనె వేడెక్కాక బిర్యానీ ఆకు, షాజీరా, దాల్చిన చెక్క, లవంగాలు, యాలకులు, అనాస పువ్వు వేసి మంచి సువాసన వచ్చే వరకు వేయించాలి.
తర్వాత పొడవుగా కట్ చేసుకున్న ఉల్లిపాయ ముక్కలు, పచ్చిమిర్చి చీలికలు వేసి ఉల్లిపాయలు లేత బంగారు వర్ణం (Golden brown) వచ్చే వరకు వేయించాలి.
ఇప్పుడు అందులో 1 టేబుల్ స్పూన్ తాజా అల్లం వెల్లుల్లి పేస్ట్ వేసి పచ్చి వాసన పోయేదాకా వేయించాలి. ఆ తర్వాత పుదీనా, సగం కొత్తిమీర ఆకులు వేసి మరో రెండు నిమిషాలు మగ్గనివ్వాలి.
ఇప్పుడు నానబెట్టుకున్న బియ్యంలోని నీళ్లన్నీ వంపేసి.. ఆ బియ్యాన్ని కుక్కర్లో వేసి మసాలాలన్నీ పట్టేలా ఒక నిమిషం పాటు నిదానంగా కలపాలి. (బియ్యం విరిగిపోకుండా జాగ్రత్తగా కలపాలి).
ఇందులో తగినన్ని నీళ్లు (2 కప్పుల బాస్మతి బియ్యానికి 3 కప్పుల నీళ్లు, అదే సోనా మసూరి అయితే 4 కప్పుల నీళ్లు) పోసి, రుచికి సరిపడా ఉప్పు వేసి బాగా కలపాలి. పైన మిగిలిన కొత్తిమీర చల్లుకోవాలి.
విజిల్స్ వచ్చాక స్టవ్ ఆఫ్ చేసి, కుక్కర్లోని ప్రెషర్ మొత్తం దానంతట అదే పోయే వరకు ఆగాలి. ఆ తర్వాత మూత తీస్తే.. గుమగుమలాడే వేడి వేడి 'క్విక్ బగారా అన్నం' రెడీ!
చిట్కా : అల్లం వెల్లుల్లి పేస్ట్ అప్పటికప్పుడు దంచుకుని వేసుకుంటే బగారా రైస్ కి మరింత అద్భుతమైన రుచి వస్తుంది. అలాగే కుక్కర్ మూత తీసిన వెంటనే గరిటెతో వేగంగా కలపకుండా, ఒక 5 నిమిషాలు ఆగి అంచు వెంబడి ప్లేట్ లోకి సర్వ్ చేసుకుంటే అన్నం ముద్దగా అవ్వకుండా మెతుకు మెతుకు అంటుకోకుండా పొడిపొడిగా వస్తుంది.
గమనిక: ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
