దీపావళి వెళ్లిపోయింది. కార్తీకమాసం వచ్చేసింది. మెల్లిగా చలి మొదలైంది.
సూర్యుడు కనిపిస్తే కానీ మంచి మీద నుంచి లేవాలనిపించదు. చలికాలంలో
అన్నిటికంటే ముందు వ్యాయామం పడకేస్తుంది. మార్నింగ్ వాక్‌కు వెళదామంటే
చల్లటి వాతావరణం, మరి కొన్ని రోజులు పోతే ఉదయం 7 గంటల వరకు మంచు పడుతునే
ఉంటుంది. పైగా ఆస్తమా, సైనస్ సమస్యలున్న వారు ఈ సీజన్‌లో ఉదయాన్నే లేచి, ఆ
చల్లటి వాతావరణంలో తిరగడం అంత మంచి కాదంటారు. ఇలాంటి పరిస్థితుల్లో ఏం
చేయాలి? చలికాలంలో వాకింగ్‌కు డుమ్మా కొట్టిన వారు ఎలాంటి ఎక్సర్‌సైజ్‌లు
చేయాలో చూద్దాం.
- వాకింగ్‌కు డుమ్మా కొట్టినా ఇంట్లోనే ఓ అరగంట యోగాసనాలు వేయండి. ఉదయం బదులు సాయంత్రం వాకింగ్ చేయండి.
- బట్టల స్టాండ్‌గా ఉపయోగిస్తున్న థ్రెడ్‌మిల్‌ను ఈ సీజన్‌లో బయటకు తీయాల్సిందే. చలిలో ఎలాగూ బయటకు వెళ్లలేరు కాబట్టి, ఉదయాన్నే ఓ అరగంట థ్రెడ్ మిల్ మీద పరిగెడితే రోజంతా ఉల్లాసంగా ఉంటుంది.
- ప్రాణాయామం, కపాలభాతి వంటి శ్వాసపరమైన వ్యాయామాలు ఈ సీజన్‌లో ఎంతో ఉపయోగకరంగా ఉంటాయి.
- ఇవేమీ కుదరని వారు 7 గంటలకయినా ఓ అరగంట ఇంటికి ఎదురుగా ఉన్న పార్క్‌లో ఆటూ ఇటూ నడిస్తే సరిపోతుంది.
- ఇబ్బంది ఉంటే ఓకే కానీ మంచు పడుతున్నా సరే ఉదయాన్నే వాకింగ్‌ను వీలయినంత
వరకు కొనసాగించాలి. మార్నింగ్ వాక్ చేస్తే రోజంతా చైతన్యంతో తొణికిసలాడటం
ఖాయం.
