సన్నబడాలనుకుంటున్నారా? జిమ్‌కో, ఫిట్‌నెస్ సెంటర్‌కో వెళ్లి బరువు
తగ్గించుకోవాలనుకుంటున్నారా? అక్కడకు వెళ్లడానికి మీకు తీరిక లేకపోతే
ఇంట్లోనే ఉండి నాజూగ్గా తయారు కావచ్చు. ఎలాగంటారా? ఈ పనులు చేసి చూడండి.
- ఇంట్లో టివిని రిమోట్ సాయం లేకుండా చూసేందుకు ప్రయత్నించండి. చానెల్ మార్చాలనుకున్నప్పుడల్లా లేచి టివిపైన ఉన్న బటన్లు ఆపరేట్ చేయండి. కుర్చీలోనో, సోఫాలోనో కూలబడి టివి చూసేకన్నా టివి బటన్లు నొక్కడానికి అప్పుడప్పుడూ కదులుతూ ఉండండి.
- ఇంట్లో మిక్సీ, గ్రైండర్ పాడైపోతే అవి రిపేరై వచ్చేవరకు వంటపని మానెయ్యకుండా రుబ్బురోలు ఉపయోగించండి. దీని వల్ల శారీరక శ్రమ జరిగి ఒంట్లో కొవ్వు కరుగుతుంది.
- పనిమనిషి రాకపోతే అంట్ల గిన్నెలను అలాగే వదిలేసే కన్నా చేతులకు కొంచెం పని కల్పించండి, నామోషీ ఫీలవ్వకుండా. ఆ శ్రమకు చెమట రూపంలో ఫలితం దక్కడం ఖాయం.
- వాషింగ్ మిషన్ పాడైపోతే మాసిన బట్టలను గుట్టలుగా పేర్చేయకుండా మీరే ఉతుక్కోవడానికి ప్రయత్నించండి. బోలెడన్ని క్యాలరీలు ఖర్చయి చలాకీగా ఉంటారు.
- పిల్లలు ఎక్కడపడితే అక్కడ పుస్తకాలు, బొమ్మలు, విడిచిన బట్టలను వదిలేస్తారు. విసుక్కోకుండా వాటిని సర్దండి. మీకు తెలియకుండానే మీ ఒళ్లు వంగుతుంది.
- పిల్లలు వేరే గదిలో ఉంటే కూర్చున్న చోటు నుంచి కదలకుండా కేకేసి వాళ్లను పిలవకండి. వాళ్ల గదిలోకి మీరే వెళ్లండి. ఇంట్లో కూడా నడక మంచిదే.
- ఇరుగుపొరుగు వారితో పనిబడితే ఫోన్‌లో మాట్లాడేందుకు ప్రయత్నించవద్చు. చక్కగా నడుచుకుంటూ వాళ్ల ఇళ్లకే వెళ్లండి. వాకింగ్ చేసినట్లు కూడా ఉంటుంది.
- వంట చేస్తున్నపుడు ఖాళీగా ఉండేకన్నా డాన్సులు గట్రా వస్తే ఆ ప్రావీణ్యాన్ని ప్రదర్శించండి. వంటతోపాటే ఎక్సర్‌సైజ్ చేసినట్లూ ఉంటుంది.
- పెంపుడు జంతువులకు స్నానం చేయించే పని ఎవరికో అప్పగించకుండా ఆ పనేదో మీరే చేస్తే మంచి వ్యాయామంలా ఉంటుంది.
