IRCTC Ticket Transfer:రైలు టికెట్ మీ పేరు మీద ఉందా? వేరొకరు ప్రయాణించాలా? క్యాన్సిల్ చేయకుండానే పేరు మార్చుకోండిలా!
సాధారణంగా రైలు టికెట్ కన్ఫర్మ్ అయ్యాక, ఏదైనా కారణం వల్ల మనం వెళ్లలేకపోతే వెంటనే టికెట్ క్యాన్సిల్ చేస్తాం. దీనివల్ల క్యాన్సిలేషన్ ఛార్జీల రూపంలో డబ్బు నష్టపోవాల్సి వస్తుంది. కానీ, ఇండియన్ రైల్వేస్ రూల్స్ ప్రకారం.. మీరు వెళ్లలేకపోతే మీ టికెట్ను మీ కుటుంబ సభ్యుల పేరు మీదకు మార్చుకోవచ్చని మీకు తెలుసా?
అవును, టికెట్ క్యాన్సిల్ చేయకుండానే ప్రయాణీకుడి పేరు మార్చుకునే 'టికెట్ ట్రాన్స్ఫర్' సౌకర్యం మనకు అందుబాటులో ఉంది. ఆ ప్రాసెస్ ఏంటో ఇప్పుడు చూద్దాం..
ఎవరి పేరు మీదకు మార్చుకోవచ్చు?
రైల్వే నిబంధనల ప్రకారం, మీరు బుక్ చేసిన టికెట్ను మీ రక్త సంబంధీకులకు మాత్రమే బదిలీ చేయగలరు. అంటే:
తండ్రి, తల్లి, సోదరుడు, సోదరి
కొడుకు, కుమార్తె
భర్త లేదా భార్య
పేరు మార్చుకోవడానికి ఏం చేయాలి?
ఈ ప్రక్రియ పూర్తిగా ఆఫ్లైన్లో జరుగుతుంది. మీరు ఆన్లైన్లో టికెట్ బుక్ చేసినా సరే, పేరు మార్పు కోసం రైల్వే స్టేషన్కు వెళ్లాల్సిందే.
ప్రింటవుట్: మీరు బుక్ చేసిన టికెట్ ప్రింటవుట్ తీసుకోండి.
ఐడీ ప్రూఫ్: ఎవరి పేరు మీదకు టికెట్ మార్చాలనుకుంటున్నారో, వారి ఆధార్ కార్డ్ లేదా ఓటర్ ఐడీ వంటి ఒరిజినల్ ఐడెంటిటీ కార్డును వెంట తీసుకెళ్లాలి.
దరఖాస్తు: రైలు బయలుదేరడానికి కనీసం 24 గంటల ముందు సమీపంలోని రైల్వే రిజర్వేషన్ కౌంటర్కు వెళ్లి 'చీఫ్ రిజర్వేషన్ సూపర్వైజర్'ను సంప్రదించాలి.
రిక్వెస్ట్ లెటర్: పేరు మార్పు కోరుతూ ఒక చిన్న అప్లికేషన్ లెటర్ ఇస్తే, వారు మీ టికెట్ మీద ప్రయాణీకుడి పేరును మారుస్తారు.
ఇతర గ్రూప్ ప్రయాణీకులకు కూడా అవకాశం!
కేవలం కుటుంబ సభ్యులకే కాకుండా, కింది వర్గాలకు కూడా పేరు మార్పు వెసులుబాటు ఉంది:
ప్రభుత్వ అధికారులు: ప్రయాణానికి 24 గంటల ముందు రాతపూర్వక అభ్యర్థనతో పేరు మార్చుకోవచ్చు.
విద్యార్థులు: విద్యాసంస్థల ద్వారా వెళ్లే వారు 48 గంటల ముందు రిక్వెస్ట్ చేస్తే, అదే సంస్థకు చెందిన ఇతర విద్యార్థుల పేరు మీదకు మార్చుకోవచ్చు.
పెళ్లి బృందాలు/పర్యాటకులు: గ్రూప్ బుకింగ్ చేసిన వారు 48 గంటల ముందు రిక్వెస్ట్ చేయాలి. అయితే, మొత్తం గ్రూప్లో కేవలం 10% మంది పేర్లు మాత్రమే మార్చడానికి అనుమతి ఉంటుంది.
గుర్తుంచుకోవాల్సిన ముఖ్య విషయాలు:
ఒక్కసారి మాత్రమే: ఒక టికెట్పై పేరు మార్పు చేసుకునే అవకాశం కేవలం ఒక్కసారి మాత్రమే ఉంటుంది.
రాయితీ టికెట్లు: కన్సెషన్ (రాయితీ) పై తీసుకున్న టికెట్లకు ఈ బదిలీ సౌకర్యం వర్తించదు.
ముందస్తు సమయం: కనీసం 24 గంటల ముందే ఈ ప్రక్రియ పూర్తి చేయాలి, చివరి నిమిషంలో కుదరదు.
గమనిక: వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
