తెలంగాణ అనగానే టక్కున గుర్తుకువచ్చే స్నాక్స్ లో 'సర్వపిండి' (కొన్ని ప్రాంతాల్లో గిన్నె అప్ప అని కూడా అంటారు) మొదటి వరుసలో ఉంటుంది. బియ్యం పిండితో చేసే ఈ సాంప్రదాయ వంటకానికి సొరకాయ తురుము తోడైతే.. ఆ రుచే వేరు!
లోపల సాఫ్ట్గా, బయట క్రిస్పీగా ఉండే ఈ సొరకాయ సర్వపిండిని సాయంత్రం పూట వేడివేడి టీతో తింటే అద్భుతంగా ఉంటుంది. లంచ్ బాక్స్కైనా, స్నాక్స్కైనా పర్ఫెక్ట్గా సరిపోయే ఈ వంటకాన్ని చాలా ఈజీగా ఎలా చేసుకోవాలో ఇప్పుడు చూద్దాం.
కావలసిన పదార్థాలు:
బియ్యం పిండి: 2 కప్పులు
సొరకాయ తురుము: 1 కప్పు
నానబెట్టిన పచ్చి శనగపప్పు: 2 టేబుల్ స్పూన్లు (అరగంట ముందు నానబెట్టాలి)
వేయించిన పల్లీలు: 2 టేబుల్ స్పూన్లు (కచ్చాపచ్చాగా దంచినవి)
నువ్వులు: 2 టేబుల్ స్పూన్లు
ఉల్లిపాయ: 1 (సన్నగా తరిగినది)
పచ్చిమిర్చి పేస్ట్ (లేదా కారం): 1 స్పూన్
అల్లం వెల్లుల్లి పేస్ట్: అర స్పూన్
కరివేపాకు, కొత్తిమీర: సన్నగా తరిగినవి తగినంత
ఉప్పు: రుచికి సరిపడా
నూనె: సర్వపిండి కాల్చడానికి సరిపడా
స్టెప్ 1: పిండి కలుపుకోవడం ముందుగా ఒక వెడల్పాటి గిన్నెలోకి బియ్యం పిండిని తీసుకోవాలి. అందులో సొరకాయ తురుము, నానబెట్టిన శనగపప్పు, పల్లీల పలుకులు, నువ్వులు, సన్నగా తరిగిన ఉల్లిపాయ ముక్కలు, పచ్చిమిర్చి పేస్ట్, అల్లం వెల్లుల్లి పేస్ట్, కరివేపాకు, కొత్తిమీర మరియు రుచికి సరిపడా ఉప్పు వేసి అన్ని పదార్థాలు కలిసేలా బాగా కలుపుకోవాలి.
స్టెప్ 2: ముద్దలా సిద్ధం చేయడం సొరకాయలో సహజంగానే నీటి శాతం ఎక్కువగా ఉంటుంది. కాబట్టి మొదట్లోనే నీళ్లు పోయకుండా పిండిని బాగా కలపాలి. సొరకాయ తడి సరిపోకపోతేనే, కొద్దికొద్దిగా నీళ్లు చల్లుకుంటూ చపాతీ పిండి కంటే కాస్త సాఫ్ట్గా (చేత్తో ఒత్తడానికి వీలుగా) ముద్దలా కలుపుకోవాలి.
స్టెప్ 3: పాన్లో ఒత్తడం ఇప్పుడు సర్వపిండి వండే గిన్నె లేదా మందపాటి నాన్స్టిక్ కడాయి తీసుకుని, దానికి ఒక చెంచా నూనె రాసి అంతటా గ్రీస్ చేయాలి. కలిపి పెట్టుకున్న పిండి నుండి పెద్ద నిమ్మకాయ సైజ్ ముద్దను తీసుకుని, గిన్నె అడుగు భాగంలో చేత్తో పల్చగా, సమానంగా ఒత్తుకోవాలి (చేతికి కొద్దిగా నూనె లేదా నీరు రాసుకుంటే పిండి అంటుకోకుండా వస్తుంది).
స్టెప్ 5: క్రిస్పీగా కాల్చడం ఇప్పుడు గిన్నెపై మూత పెట్టి స్టవ్ మీద ఉంచాలి. మంటను మీడియం ఫ్లేమ్లో పెట్టి 8 నుండి 10 నిమిషాల పాటు ఉడికించాలి.
సర్వపిండి అంచులు గిన్నె నుండి విడిపోయి, కింది భాగం గోల్డెన్ బ్రౌన్ కలర్లోకి వచ్చాక మూత తీసి మరో నిమిషం పాటు ఉంచాలి. అంతే.. ఎంతో రుచికరమైన, కరకరలాడే సొరకాయ సర్వపిండి రెడీ! దీన్ని ప్లేట్లోకి తీసుకుని వేడివేడిగా తింటే చాలా బాగుంటుంది.
కొన్ని ముఖ్యమైన టిప్స్:
సొరకాయ ముదురుది కాకుండా లేతగా ఉండేలా చూసుకుంటే తురమడం సులువవుతుంది, టేస్ట్ కూడా బాగుంటుంది.
సర్వపిండిని వీలైనంత పల్చగా ఒత్తితే అంత క్రిస్పీగా వస్తుంది. లావుగా ఒత్తితే మెత్తగా రొట్టెలా ఉంటుంది. మీకు నచ్చిన విధంగా ఒత్తుకోవచ్చు.
ఒకవేళ రెండో వైపు కూడా క్రిస్పీగా కావాలనుకుంటే.. నిదానంగా తిరగేసి మరో రెండు నిమిషాలు కాల్చుకోవచ్చు.
గమనిక: ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
