స్వీట్ కార్న్ పకోడా
కావలసిన పదార్థాలు:
- స్వీట్ కార్న్ - 1 కప్పు (ఉడికించి మెత్తగా రుబ్బినది)
- ఉల్లిపాయ - 1 (పెద్దది, సన్నగా తరిగినది)
- శనగపిండి - ½ కప్పు
- పచ్చిమిర్చి - 2 లేదా 3 (సన్నగా తరిగినవి)
- బియ్యం పిండి - 1 టేబుల్ స్పూన్
- పసుపు - చిటికెడు
- అల్లం-వెల్లుల్లి పేస్ట్ - 1 టేబుల్ స్పూన్
- చాట్ మసాలా - చిటికెడు
- కొత్తిమీర - కొద్దిగా (సన్నగా తరిగినది)
- కరివేపాకు - కొన్ని (తరిగినవి)
- జీలకర్ర పొడి - చిటికెడు
- నూనె - వేయించడానికి సరిపడా
- ఉప్పు - రుచికి తగినంత
తయారీ విధానం:
స్వీట్ కార్న్ పకోడా చేయడానికి ముందుగా ఒక గిన్నెలో రుబ్బిన స్వీట్ కార్న్ వేసి, అందులో తరిగిన ఉల్లిపాయలు, పచ్చిమిర్చి, అల్లం-వెల్లుల్లి పేస్ట్, కరివేపాకు, కొత్తిమీర, పసుపు, చాట్ మసాలా, జీలకర్ర పొడి, శనగపిండి, బియ్యం పిండి, ఉప్పు వేసి అన్నీ బాగా కలపాలి.
గ్యాస్ మీద పాన్‌లో నూనె పోసి వేడి చేయాలి. నూనె కాగిన తర్వాత, పిండిని చిన్న చిన్న భాగాలుగా చేతితో తీసుకుని వేడి నూనెలో వేయాలి. పకోడాలు బంగారు రంగు వచ్చే వరకు వేయించి తీసేయాలి.
ఇప్పుడు రుచికరమైన స్వీట్ కార్న్ పకోడా సిద్ధం! టొమాటో కెచప్‌తో సర్వ్ చేస్తే రుచి అద్భుతంగా ఉంటుంది. సాయంత్రం స్నాక్స్‌గా పిల్లలకు ఇస్తే చాలా ఇష్టంగా తింటారు.
