Tomato Charu:టమాటో రసం ఇలా పెట్టారంటే కూరలు పక్కనపెట్టి అన్నం మొత్తం రసంతోనే లాగిస్తారు.. మనం టమాటాలతో రకరకాల వంటకాలను తయారు చేస్తూ ఉంటాం. టమాటాలు మన శరీరానికి ఎంతో మేలు చేస్తాయి, ఎందుకంటే వీటిలో యాంటీ ఆక్సిడెంట్లు సమృద్ధిగా ఉంటాయి. రక్తపోటు, కంటి సమస్యలను తగ్గించడంలో టమాటాలు గొప్పగా సహాయపడతాయి.
టమాటా చారు తయారీకి కావాల్సిన పదార్థాలు:
టమాటాలు – 3 (పెద్దవి)
చింతపండు – 20 గ్రాములు
పసుపు – అర టీస్పూన్
కారం – అర టీస్పూన్
ఉప్పు – రుచికి సరిపడా
నీళ్లు – తగినంత
తరిగిన కొత్తిమీర – కొద్దిగా
నూనె – 2 టేబుల్ స్పూన్లు
శనగపప్పు – 1 టేబుల్ స్పూన్
మినపప్పు – 1 టేబుల్ స్పూన్
జీలకర్ర – అర టీస్పూన్
ఆవాలు – అర టీస్పూన్
ఎండుమిర్చి – 2
దంచిన వెల్లుల్లి – 4 రెబ్బలు
పొడుగ్గా తరిగిన ఉల్లిపాయ – 1
తరిగిన పచ్చిమిర్చి – 2
ఇంగువ – పావు టీస్పూన్
కరివేపాకు – 1 రెబ్బ
చారు పొడి తయారీకి కావాల్సిన పదార్థాలు:
జీలకర్ర – 1 టీస్పూన్
ధనియాలు – 1 టీస్పూన్
వెల్లుల్లి రెబ్బలు – 3
ఎండుమిరపకాయలు – 3
పసుపు – పావు టీస్పూన్
మిరియాలు – 1 టీస్పూన్
ఇంగువ – అర టీస్పూన్
మెంతులు – పావు టీస్పూన్
కరివేపాకు – 1 రెబ్బ
కందిపప్పు – 2 టేబుల్ స్పూన్లు
ఉలవలు – 1 టేబుల్ స్పూన్
ఉప్పు – కొద్దిగా
ముందుగా చింతపండును తగినంత నీటిలో నానబెట్టాలి.చారు పొడి కోసం ఉప్పు, ఇంగువ, పసుపు మినహా మిగిలిన పదార్థాలను కొద్దిగా వేయించి, మెత్తని పొడిగా చేయాలి. తర్వాత ఈ పొడిలో ఉప్పు, పసుపు, ఇంగువ కలిపి ఉంచాలి.
రెండు టమాటాలను ముక్కలుగా కోసి, జార్‌లో వేసి మెత్తగా గ్రైండ్ చేయాలి. మిగిలిన ఒక టమాటాను పొడుగ్గా తరిగి పక్కన పెట్టుకోవాలి.నానబెట్టిన చింతపండు నుండి రసాన్ని తీసి, గ్రైండ్ చేసిన టమాటా గుజ్జుతో కలిపి వడకట్టాలి.
కళాయిలో నూనె వేసి కాగిన తర్వాత తాళింపు పదార్థాలను వేసి వేగించాలి.తాళింపు వేగిన తర్వాత, తరిగి పెట్టుకున్న టమాటా ముక్కలను వేసి వేయించాలి. టమాటా ముక్కలు వేగిన తర్వాత, పసుపు, కారం, చారు పొడి వేసి కలపాలి. అనంతరం వడకట్టి పెట్టుకున్న చింతపండు-టమాటా రసాన్ని జోడించాలి.
రుచికి సరిపడా ఉప్పు, తగినంత నీళ్లు పోసి మరిగించాలి. చివరగా, తరిగిన కొత్తిమీర వేసి ఒక నిమిషం మరిగించి స్టవ్ ఆఫ్ చేయాలి. ఇలా చేస్తే రుచికరమైన టమాటా చారు సిద్ధమవుతుంది. ఈ చారును అన్నంతో కలిపి తీసుకుంటే రుచిగా ఉండడమే కాకుండా, ఆరోగ్యానికి కూడా ఎంతో మేలు చేస్తుంది.
