Acidity:అసిడిటీ సమస్య మిమ్మల్ని ఇబ్బంది పెడుతోందా? అయితే ఈ సహజసిద్ధమైన చిట్కాలను పాటించండి..గ్యాస్, అసిడిటీ వంటి జీర్ణ సమస్యలు మనల్ని తరచూ ఇబ్బందులకు గురి చేస్తాయి. జీర్ణాశయంలో ఆమ్లాలు అవసరానికి మించి ఉత్పత్తి అయినప్పుడు పొట్టలో ఆమ్లత్వం ఏర్పడుతుంది, దీనివల్ల కడుపులో మంట, గ్యాస్, లేదా గుండెల్లో మంట (హార్ట్ బర్న్) వంటి సమస్యలు తలెత్తుతాయి.
కొందరికి ఛాతీ, మెడ భాగాల్లో నొప్పి కూడా కలుగుతుంది. అసిడిటీ రావడానికి కారణాలు బహుముఖంగా ఉంటాయి: కొవ్వు పదార్థాలు, కారం, మసాలా ఆహారాలు అధికంగా తినడం, ఒత్తిడి, ఆందోళన, సరైన సమయంలో భోజనం చేయకపోవడం, శీతల పానీయాలు, టీ, కాఫీలను అతిగా సేవించడం, రాత్రి నిద్రలేమి, లేదా కొన్ని మందుల వాడకం. అయితే, ఇంట్లోనే లభించే కొన్ని పదార్థాలతో ఈ సమస్య నుంచి సులభంగా బయటపడవచ్చు. ఈ చిట్కాలను పాటిస్తే అసిడిటీ నుంచి ఉపశమనం పొందవచ్చు.
బేకింగ్ సోడా, జీలకర్ర
అసిడిటీ తగ్గించడానికి బేకింగ్ సోడా అద్భుతంగా పనిచేస్తుంది. ఇది ఆల్కలైన్ స్వభావం కలిగి ఉండటం వల్ల జీర్ణాశయంలోని ఆమ్లాలను తటస్థం చేస్తుంది. ఒక గ్లాసు నీటిలో ఒక టీస్పూన్ బేకింగ్ సోడా కలిపి తాగితే అసిడిటీ త్వరగా తగ్గుతుంది. అయితే, ఇందులో లవణాలు ఎక్కువగా ఉండటం వల్ల రక్తపోటు (హైబీపీ) ఉన్నవారు దీనిని ఉపయోగించకూడదు.
అలాగే, జీలకర్ర కూడా జీర్ణ సమస్యలను తగ్గిస్తుంది. ఒక టీస్పూన్ జీలకర్ర పొడిని నీటిలో కలిపి తాగితే అసిడిటీ, రక్తపోటు తగ్గడమే కాక, జీర్ణాశయంలో అల్సర్లు రాకుండా నిరోధిస్తుంది. అల్లంలోని యాంటీ-ఇన్‌ఫ్లమేటరీ గుణాలు అసిడిటీని తగ్గిస్తాయి. కొద్దిగా అల్లం రసాన్ని సేవించడం లేదా ఒక గ్లాసు నీటిలో అల్లం ముక్క వేసి మరిగించి తాగడం వల్ల అసిడిటీ నుంచి ఉపశమనం లభిస్తుంది.
తులసి ఆకులు, అరటి పండ్లు
తులసి ఆకులు అల్సర్లను తగ్గించే గుణం కలిగి ఉంటాయి. రోజూ తులసి ఆకులను నమిలి తినడం వల్ల అసిడిటీ నియంత్రణలో ఉంటుంది మరియు జీర్ణాశయ గోడలను రక్షిస్తుంది. పసుపులోని కర్క్యుమిన్ అనే సమ్మేళనం యాంటీ-ఇన్‌ఫ్లమేటరీ గుణాలను కలిగి ఉండి అసిడిటీ మరియు అల్సర్లను తగ్గిస్తుంది.
చిటికెడు పసుపును నీటిలో కలిపి తాగితే మంచి ఫలితం ఉంటుంది. సోంపు గింజలు కూడా అసిడిటీని తగ్గించడంలో సమర్థవంతంగా పనిచేస్తాయి. భోజనం తర్వాత గుప్పెడు సోంపు గింజలను నమిలి తినడం వల్ల సమస్య తగ్గుతుంది. అరటి పండ్లలో సహజసిద్ధమైన యాంటాసిడ్ గుణాలు ఉండటం వల్ల కడుపులో మంట, గ్యాస్ తగ్గి, జీర్ణ వ్యవస్థ ఆరోగ్యంగా ఉంటుంది.
మజ్జిగ ఒక గ్లాసు మజ్జిగలో జీలకర్ర పొడి, కరివేపాకు పొడి లేదా పుదీనా ఆకుల రసాన్ని కలిపి తాగడం వల్ల అసిడిటీ నుంచి ఉపశమనం లభిస్తుంది. ఇవి జీర్ణ వ్యవస్థను రక్షిస్తాయి. అసిడిటీ సమస్య ఉన్నవారు కొంతకాలం తేలికగా జీర్ణమయ్యే ఆహారాలను తినాలి.
కొవ్వు, కారం, మసాలా ఆహారాలు, మద్యం, పొగాకు, జంక్ ఫుడ్, పచ్చళ్లకు దూరంగా ఉండాలి. సమయానికి భోజనం చేయడం, ఫైబర్ అధికంగా ఉండే ఆహారాలను తీసుకోవడం వల్ల అసిడిటీ నియంత్రణలో ఉంటుంది. ఈ చిట్కాలు, జాగ్రత్తలను పాటిస్తే అసిడిటీ సమస్య నుంచి ఉపశమనం పొంది, జీర్ణ వ్యవస్థ ఆరోగ్యంగా ఉంటుంది.
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
