Moong dal khichdi:బరువు తగ్గాలా? ప్రొటీన్ కావాలా? ఖరీదైన డైట్లు వద్దు.. లంచ్లో ఈ టేస్టీ 'మూంగ్ దాల్ కిచిడీ' లాగించేయండి!
ఇప్పుడు ఎక్కడ చూసినా ప్రొటీన్ ఫుడ్, వెయిట్ లాస్ డైట్ల గురించే చర్చ. అయితే ఆరోగ్యంగా, ఫిట్గా ఉండటానికి వేల రూపాయలు ఖర్చు పెట్టి ఫ్యాన్సీ డైట్లు చేయాల్సిన అవసరం లేదు. మన ఇంట్లో ఉండే పెసరపప్పు (Moong Dal), బియ్యంతో చేసే వేడివేడి 'కిచిడీ' తింటే చాలు.. బోలెడన్ని ఆరోగ్య ప్రయోజనాలు మీ సొంతం!
లంచ్కి పర్ఫెక్ట్ ఆప్షన్ అయిన ఈ మూంగ్ దాల్ కిచిడీ వల్ల కలిగే లాభాలు, దీన్ని సింపుల్గా ఎలా చేసుకోవాలో ఇప్పుడు చూద్దాం.
ఈ కిచిడీతో ఇన్ని లాభాలా?
వెయిట్ లాస్ సూపర్ ఫుడ్: ఇందులో కేలరీలు, కొవ్వు చాలా తక్కువ. ఫైబర్ ఎక్కువ. ఇది లంచ్లో తింటే ఎక్కువసేపు పొట్ట నిండినట్లు ఉండి, పదే పదే చిరుతిళ్లు తినాలనే కోరిక తగ్గుతుంది. బరువు తగ్గాలనుకునేవారికి ఇది బెస్ట్ లంచ్ ఆప్షన్.
ప్రొటీన్ పవర్హౌస్: పెసరపప్పులో ప్రొటీన్ పుష్కలంగా ఉంటుంది. కండరాలు బలంగా మారడానికి ఇది చాలా ముఖ్యం. ముఖ్యంగా మాంసాహారం తినని వారికి (Vegetarians) ఇది అద్భుతమైన ప్రొటీన్ సోర్స్.
జీర్ణక్రియకు మేలు: ఇది చాలా తేలికగా జీర్ణమవుతుంది. గ్యాస్, ఎసిడిటీ, అజీర్తి లాంటి సమస్యలు దరిచేరవు. జ్వరం, జలుబు లేదా నీరసంగా ఉన్నప్పుడు ఈ కిచిడీ తింటే శరీరానికి ఇన్స్టంట్ ఎనర్జీ వస్తుంది.
కావాల్సిన పదార్థాలు:
కిచిడీ కోసం: బియ్యం - 1 కప్పు, పెసరపప్పు - ముప్పావు కప్పు (¾), పసుపు - ½ టీస్పూన్, ఇంగువ - ¼ టీస్పూన్, ఉప్పు - తగినంత, నీళ్లు - 4 కప్పులు.
స్పెషల్ తాలింపు కోసం: నెయ్యి - 2 టేబుల్ స్పూన్లు, జీలకర్ర - 1 టీస్పూన్, ఇంగువ - ¼ టీస్పూన్, ఎండుమిర్చి - 2-3, కరివేపాకు - 6-8, సన్నగా తరిగిన వెల్లుల్లి & అల్లం - కొద్దిగా, పచ్చిమిర్చి - 2, ఉల్లిపాయలు - 2 (సన్నగా తరిగినవి), టమాటాలు - 2 (తరిగినవి), కారం - 1 టీస్పూన్, ఆమ్చూర్ పౌడర్ (ఎండు మామిడికాయ పొడి) - ½ టీస్పూన్, కొత్తిమీర - కొద్దిగా.
తయారీ విధానం.. చాలా సింపుల్!
ముందుగా బియ్యం, పెసరపప్పును శుభ్రంగా కడిగి 30-40 నిమిషాల పాటు నీళ్లలో నానబెట్టాలి. కుక్కర్లో నానబెట్టిన బియ్యం, పప్పు వేసి.. తగినంత ఉప్పు, పసుపు, కొద్దిగా ఇంగువ, 4 కప్పుల నీళ్లు పోసి 3 నుంచి 4 విజిల్స్ వచ్చే వరకు మెత్తగా ఉడికించుకోవాలి.
ఇప్పుడు స్టవ్ మీద పాన్ పెట్టి నెయ్యి వేడి చేయాలి. అందులో జీలకర్ర, ఇంగువ, ఎండుమిర్చి, కరివేపాకు వేసి వేయించాలి. ఆ తర్వాత అల్లం, వెల్లుల్లి, పచ్చిమిర్చి, ఉల్లిపాయ ముక్కలు వేసి దోరగా వేయించాలి.
ఉల్లిపాయలు వేగాక టమాటా ముక్కలు వేసి మెత్తబడేదాకా మగ్గనివ్వాలి. ఇప్పుడు కారం, ఆమ్చూర్ పౌడర్ వేసి బాగా కలపాలి.
కుక్కర్ ప్రెజర్ పోయాక, మెత్తగా ఉడికిన కిచిడీని ఈ తాలింపులో వేసి బాగా కలపాలి. పైన కొత్తిమీర చల్లుకుని స్టవ్ ఆఫ్ చేయాలి.
వేడివేడి కిచిడీ మీద కాస్త నెయ్యి వేసుకుని తింటే ఆ మజాయే వేరు! ఇంకెందుకు ఆలస్యం.. రేపు మీ ఇంట్లో లంచ్కి దీన్ని ట్రై చేయండి.
