Breakfast Ideas:స్టవ్ వెలిగించే పనే లేదు.. గ్యాస్ తో అవసరమే లేదు: నిమిషాల్లో రెడీ అయ్యే 3 సూపర్ హెల్తీ బ్రేక్ఫాస్ట్లు!
ఉదయాన్నే హడావిడిగా ఆఫీసులకు, స్కూళ్లకు వెళ్లే సమయంలో వంట చేయడం పెద్ద టాస్క్. దానికి తోడు వంట గ్యాస్ ధరలు చూస్తే భయమేస్తోంది.
వంట గ్యాస్ను ఆదా చేసుకుంటూ, పొయ్యి వెలిగించే పనే లేకుండా ఉదయాన్నే కడుపు నిండా, ఆరోగ్యంగా తినగలిగితే ఎంత బాగుంటుంది? అవును, స్టవ్ తో పనిలేకుండా చేసుకోగలిగే 3 అద్భుతమైన, రుచికరమైన బ్రేక్ఫాస్ట్ ఐడియాలు మీకోసం!
ఈ బ్రేక్ఫాస్ట్లు మీ ఆకలిని తీర్చడమే కాకుండా, రోజంతా మిమ్మల్ని ఎనర్జిటిక్గా ఉంచుతాయి:
1. హెల్తీ యోగర్ట్ బౌల్ (పెరుగుతో అల్పాహారం): ఉదయాన్నే పెరుగుతో తీసుకునే బ్రేక్ఫాస్ట్ పొట్టకు చాలా చలవ చేస్తుంది.
ఎలా చేయాలి?: ఒక బౌల్లో కొద్దిగా చిక్కటి, కమ్మని పెరుగు తీసుకోండి. అందులో సన్నగా తరిగిన అరటిపండు ముక్కలు, నచ్చిన డ్రై ఫ్రూట్స్ (బాదం, జీడిపప్పు), గుమ్మడి లేదా పొద్దుతిరుగుడు గింజలు వేసి బాగా కలపండి. తీపి కోసం కొద్దిగా తేనె లేదా పొడి చేసిన బెల్లం కలుపుకుని తింటే.. అమృతంలా ఉంటుంది.
ప్రయోజనం: దీని ద్వారా శరీరానికి కావాల్సిన ప్రోటీన్, కాల్షియం తక్షణమే అందుతాయి.
2. ఓవర్నైట్ ఓట్స్ (రాత్రే నానబెట్టిన ఓట్స్): ఇది వండాల్సిన అవసరం లేని అత్యంత సులభమైన, పాపులర్ బ్రేక్ఫాస్ట్.
ఎలా చేయాలి?: ఒక గాజు సీసా లేదా బౌల్ తీసుకుని.. అందులో రోల్డ్ ఓట్స్, పాలు (లేదా పెరుగు) వేసి కలపండి. దీనికి కొద్దిగా చియా సీడ్స్, డ్రై ఫ్రూట్స్, నచ్చిన పండ్లు (ఆపిల్, దానిమ్మ వంటివి), కాస్త తేనె కలిపి మూతపెట్టి రాత్రంతా ఫ్రిజ్లో ఉంచండి.
ప్రయోజనం: ఉదయం లేవగానే చల్లచల్లగా, రుచిగా ఉండే ఈ ఓట్స్ తింటే.. బరువు తగ్గాలనుకునే వారికి, షుగర్ ఉన్నవారికి ఇది బెస్ట్ ఆప్షన్.
3. ప్రొటీన్ రిచ్ మొలకల సలాడ్: మొలకలు ఆరోగ్యానికి ఎంత మంచిదో ప్రత్యేకంగా చెప్పనక్కర్లేదు. ఇవి సులభంగా జీర్ణమవుతాయి.
ఎలా చేయాలి?: ముందుగా పెసలు, శనగలు నీళ్లలో నానబెట్టి, మరుసటి రోజు తడిగుడ్డలో కట్టి మొలకలు రానివ్వాలి. ఈ మొలకలను శుభ్రంగా కడిగి.. అందులో సన్నగా తరిగిన కీరదోస, టమాటా, ఉల్లిపాయ, తురిమిన క్యారెట్ వేయండి.
రుచి కోసం: దీనికి కాస్త నిమ్మరసం, చిటికెడు ఉప్పు, కొద్దిగా జీలకర్ర పొడి, ఒక స్పూన్ ఆలివ్ ఆయిల్ వేసి బాగా మిక్స్ చేయండి.
ప్రయోజనం: అధిక ప్రోటీన్ ఉండే ఈ సలాడ్ ఉదయాన్నే తింటే కడుపు నిండుగా అనిపిస్తుంది, నీరసం దరిచేరదు.
హెల్త్ టిప్: గ్యాస్ కొరత ఉన్న సమయంలోనే కాకుండా, రోజూవారీ ఉరుకుల పరుగుల జీవితంలో సమయాన్ని ఆదా చేసుకోవడానికి, ఆరోగ్యాన్ని కాపాడుకోవడానికి ఈ 'నో-కుక్' బ్రేక్ఫాస్ట్లు కచ్చితంగా ట్రై చేయండి!
