Palakura Ragi Idli;ఉదయాన్నే రొటీన్ ఇడ్లీలు బోర్ కొట్టాయా? అయితే రుచికి రుచి, బలాన్నిచ్చే 'పాలకూర-రాగి ఇడ్లీ' ట్రై చేయండి!
ఉదయం బ్రేక్ ఫాస్ట్ అనగానే మనందరికీ ముందుగా గుర్తొచ్చేది ఇడ్లీ. కానీ రోజూ అవే తెల్లటి ఇడ్లీలు తిని బోర్ కొట్టిందా? అయితే ఈసారి కాస్త వెరైటీగా, ఎంతో ఆరోగ్యకరమైన 'పాలకూర-రాగి ఇడ్లీ' ట్రై చేయండి.
రాగి, పాలకూర కలయికలో చేసే ఈ ఇడ్లీలు రుచికి మాత్రమే కాదు, ఆరోగ్యానికి కూడా అమృతం లాంటివి. పిల్లల నుంచి పెద్దల వరకు, ముఖ్యంగా డయాబెటిస్ ఉన్నవారు కూడా ఎలాంటి భయం లేకుండా వీటిని కడుపు నిండా తినొచ్చు.
ఈ ఇడ్లీలు ఎందుకు తినాలంటే.. (ఆరోగ్య ప్రయోజనాలు):
ఎముకలకు బలం: రాగుల్లో క్యాల్షియం పుష్కలంగా ఉంటుంది, ఇది ఎముకలను దృఢంగా ఉంచుతుంది.
బరువు తగ్గడానికి బెస్ట్: ఇందులోని ఫైబర్ జీర్ణక్రియను మెరుగుపరిచి, మలబద్ధకం సమస్యను దూరం చేస్తుంది. పొట్ట నిండిన ఫీలింగ్ ఇచ్చి బరువు తగ్గడంలో సహాయపడుతుంది.
షుగర్ కంట్రోల్: రాగుల్లో గ్లైసెమిక్ ఇండెక్స్ (GI) తక్కువగా ఉండటం వల్ల ఇది రక్తంలో చక్కెర స్థాయిలను అదుపులో ఉంచుతుంది. డయాబెటిక్ పేషెంట్లకు ఇది దివ్యౌషధం.
రక్తహీనతకు చెక్: పాలకూరలో ఐరన్, విటమిన్లు అధికంగా ఉంటాయి. ఇవి రక్తహీనతను తగ్గించి, శరీరానికి రోజంతా కావాల్సిన శక్తిని అందిస్తాయి.
కావలసిన పదార్థాలు:
రాగి పిండి: 1 కప్పు
ఇడ్లీ రవ్వ: 1 కప్పు
పెరుగు: 1 కప్పు
పాలకూర: 1 కప్పు (సన్నగా తురుముకోవాలి)
పచ్చిమిర్చి: 2
జీలకర్ర: 1/2 టీస్పూన్
బేకింగ్ సోడా: చిటికెడు
ఉప్పు: రుచికి సరిపడా
తయారీ విధానం:
ముందుగా ఒక గిన్నెలో రాగి పిండి, ఇడ్లీ రవ్వ, పెరుగు తీసుకుని ఉండలు లేకుండా కలుపుకోవాలి. సాధారణ ఇడ్లీ పిండి లాగా వచ్చేలా అవసరమైతే కొద్దిగా నీళ్లు పోసి కలపాలి.
ఇప్పుడు సన్నగా తరిగిన పాలకూర, పచ్చిమిర్చి, అల్లం ముక్కలు, జీలకర్రను ఆ పిండిలో వేసి బాగా కలపాలి. (పిల్లలు ఆకులు తీసి పక్కన పెడతారనుకుంటే.. పాలకూర, పచ్చిమిర్చిని మిక్సీ పట్టి పేస్ట్ లా చేసి కూడా కలుపుకోవచ్చు).
రుచికి తగినంత ఉప్పు వేసుకుని, ఈ మిశ్రమాన్ని మూతపెట్టి కనీసం 20 నుండి 30 నిమిషాల పాటు నాననివ్వాలి.
ఇడ్లీలు వేసే ముందు పిండిలో చిటికెడు బేకింగ్ సోడా వేసి ఒకసారి కలుపుకోవాలి. ఇప్పుడు ఇడ్లీ ప్లేట్లకు కొద్దిగా నూనె రాసి, ఈ పిండిని వేసి 10 నుంచి 12 నిమిషాల పాటు ఆవిరి మీద ఉడికించాలి.
అంతే.. ఎంతో మృదువైన, వేడి వేడి 'పాలకూర రాగి ఇడ్లీలు' రెడీ! వీటిని పల్లి చట్నీ, కొబ్బరి చట్నీ లేదా వేడి వేడి సాంబార్తో తింటే ఆ రుచే వేరు. ఇంకెందుకు ఆలస్యం.. వెంటనే ఈ హెల్తీ ఇడ్లీలను మీ ఇంట్లో ట్రై చేసేయండి.
