హిందూ సంప్రదాయ వివాహాల్లో 'మాంగల్య ధారణ' (తాళి కట్టడం) ఘట్టానికి ఎంతో ప్రాముఖ్యత ఉంది. పెళ్లి అనగానే మనకు ముందుగా గుర్తొచ్చేది మూడు ముళ్లు, ఏడు అడుగులే. అయితే, వరుడు.. వధువు మెడలో సరిగ్గా మూడు ముళ్లే ఎందుకు వేస్తాడో ఎప్పుడైనా ఆలోచించారా? రెండు లేదా నాలుగు ఎందుకు వేయరు?
దీని వెనుక కేవలం ఆచారం మాత్రమే కాదు, ఎంతో గొప్ప వేద రహస్యం, జీవన తత్వం దాగి ఉన్నాయి. అవేంటో ఇక్కడ తెలుసుకుందాం.
మనసా, వాచా, కర్మణా..
హిందూ ధర్మంలో 'మూడు' అనే అంకెకు చాలా విశిష్టత ఉంది. త్రిమూర్తులు (బ్రహ్మ, విష్ణు, మహేశ్వరులు), త్రిగుణాలు (సత్వ, రజో, తమో గుణాలు), త్రికరణాలు (మనస్సు, వాక్కు, కర్మ) ఇలా అన్నింటిలోనూ మూడే ఉంటాయి. అలాగే వివాహ బంధంలో కూడా మనసా, వాచా, కర్మణా (ఆలోచన, మాట, పని) ఒకరికొకరు తోడుగా, నిజాయితీగా ఉంటామని ప్రమాణం చేయడమే ఈ మూడు ముళ్ల అంతరార్థం.
దీనిలో ఒక్కో ముడికి ఒక్కో ప్రత్యేకమైన అర్థం ఉంది:
మొదటి ముడి (భార్యాభర్తల బంధం): ఈ మొదటి ముడిని వరుడు స్వయంగా వధువు మెడలో వేస్తాడు. ఇది భార్యాభర్తల మధ్య ఉండే ప్రేమ, నమ్మకం, అన్యోన్యతకు ప్రతీక. "నా ప్రాణానికి ప్రాణంగా నిన్ను చూసుకుంటాను, నా జీవితంలో నీకు సగభాగం ఇస్తున్నాను" అని భర్త చేసే వాగ్దానానికి ఈ ముడి నిదర్శనం.
రెండవ ముడి (కుటుంబాల కలయిక): హిందూ వివాహం కేవలం ఇద్దరు వ్యక్తుల కలయిక కాదు, రెండు కుటుంబాల అనుబంధం. ఈ రెండవ ముడి అత్తమామలను, కుటుంబ సభ్యులను తన సొంత తల్లిదండ్రుల్లాగే గౌరవిస్తానని వధువు చేసే వాగ్దానానికి, అలాగే వధువును తమ సొంత కూతురిలా చూసుకుంటామని అత్తింటివారు ఇచ్చే భరోసాకు ప్రతీక.
మూడవ ముడి (దైవ భక్తి / ఆధ్యాత్మిక బంధం): ఈ బంధం దేవుని సాక్షిగా కలకాలం పచ్చగా నిలవాలని ప్రార్థిస్తూ వేసే ముడి ఇది. ఇద్దరూ కలిసి ధర్మబద్ధమైన జీవితాన్ని గడుపుతూ, సమాజానికి ఆదర్శంగా నిలవాలని దీని అర్థం. సాంప్రదాయం ప్రకారం కొన్ని ప్రాంతాల్లో ఈ మూడో ముడిని వరుడి సోదరి (ఆడపడుచు) వేస్తుంది. వదినకు తాను ఎప్పుడూ అండగా ఉంటానని చెప్పడానికి ఇది సంకేతం.
దేహాలు వేరైనా ప్రాణం ఒక్కటే!
వేదాంత పరంగా చూస్తే మనిషికి స్థూల, సూక్ష్మ, కారణ శరీరాలు అని మూడు దేహాలు ఉంటాయి. వివాహం ద్వారా భార్యాభర్తల ఈ మూడు శరీరాలు ఏకమవుతాయని, ఇద్దరి దేహాలు వేరైనా ప్రాణం ఒక్కటే అని చెప్పడానికే పండితులు మంత్రోచ్ఛారణల మధ్య ఈ మూడు ముళ్లు వేయిస్తారు.
కేవలం ఒక దారానికి పసుపు రాసి కట్టే తంతు కాదు మాంగల్య ధారణ. రెండు మనసులను, రెండు కుటుంబాలను, జీవితకాలపు బాధ్యతను పెనవేసే పవిత్రమైన బంధం ఈ మూడు ముళ్ల బంధం!
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
