ఉదయం బ్రేక్‌ఫాస్ట్ అనగానే ముందుగా గుర్తొచ్చేవి ఇడ్లీ, దోశ, వడ. వీటికి అసలైన రుచి రావాలంటే పక్కన కమ్మటి చట్నీ ఉండాల్సిందే. ముఖ్యంగా పల్లీల చట్నీ (Peanut Chutney) ఉంటే ఆ మజాయే వేరు. బయట హోటల్‌లో దొరికే అదే రుచితో, చాలా సులభంగా ఇంట్లోనే పల్లీ చట్నీ ఎలా తయారు చేయాలో ఇప్పుడు చూద్దాం.
కావాల్సిన పదార్థాలు:
పల్లీలు (వేరుశనగ గుళ్లు) - 1 కప్పు
పచ్చిమిర్చి - 4 నుండి 5 (కారాన్ని బట్టి)
వెల్లుల్లి రెబ్బలు - 3
చింతపండు - చిన్న రెమ్మ (ఆప్షనల్)
జీలకర్ర - 1/2 టీస్పూన్
ఉప్పు - రుచికి సరిపడా
నూనె - 1 టీస్పూన్
నూనె - 1 టేబుల్ స్పూన్
ఆవాలు, జీలకర్ర - 1/2 టీస్పూన్
మినప్పప్పు - 1/2 టీస్పూన్
ఎండుమిర్చి - 1
కరివేపాకు - 2 రెమ్మలు
తయారీ విధానం:
పల్లీలు వేయించడం: ముందుగా స్టవ్ మీద మందపాటి పాన్ పెట్టి పల్లీలను వేసుకోవాలి. మంటను సిమ్‌లో పెట్టి దోరగా వేయించుకోవాలి. ఇలా చేస్తే పల్లీలు లోపల వరకు వేగి చట్నీ కమ్మగా ఉంటుంది. వేగిన పల్లీలను చల్లార్చి, పొట్టు తీసి పక్కన పెట్టుకోవాలి (పొట్టు తీయకపోయినా పర్వాలేదు).
పచ్చిమిర్చి వేయించడం: అదే పాన్‌లో ఒక టీస్పూన్ నూనె వేసి, పచ్చిమిర్చి ముక్కలు, జీలకర్ర వేసి కొద్దిగా వేయించుకుని స్టవ్ ఆఫ్ చేయాలి.
మిక్సీ పట్టడం: ఇప్పుడు మిక్సీ జార్ తీసుకుని.. అందులో వేయించి పెట్టుకున్న పల్లీలు, పచ్చిమిర్చి, జీలకర్ర, వెల్లుల్లి రెబ్బలు, చిన్న చింతపండు రెమ్మ, రుచికి సరిపడా ఉప్పు వేయాలి. నీళ్లు పోయకుండా ముందుగా ఒకసారి బరకగా మిక్సీ పట్టుకోవాలి.
పోపు వేయడం: చివరగా స్టవ్ మీద చిన్న కడాయి పెట్టి, ఒక టేబుల్ స్పూన్ నూనె వేడి చేయాలి. అందులో ఆవాలు, జీలకర్ర, మినప్పప్పు, ఎండుమిర్చి, కరివేపాకు వేసి వేగనివ్వాలి. ఈ పోపును తీసుకెళ్లి చట్నీలో కలిపేస్తే గుమగుమలాడే పల్లీ చట్నీ రెడీ!
చిట్కా: చట్నీకి మరింత రుచి, చిక్కదనం రావాలంటే పల్లీలతో పాటు ఒక టేబుల్ స్పూన్ పుట్నాల పప్పు (వేపిన శనగపప్పు) కూడా కలిపి మిక్సీ పట్టుకోవచ్చు. పుదీనా ఇష్టపడేవారు పచ్చిమిర్చితో పాటు కొద్దిగా పుదీనా ఆకులు వేయించుకుని కలుపుకుంటే ఫ్లేవర్ అద్భుతంగా ఉంటుంది.
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
