డయాబెటిస్ ఉందంటే చాలు.. ఏది తినాలో, ఏది తినకూడదో అన్న భయం ఎప్పుడూ వెంటాడుతూనే ఉంటుంది. ముఖ్యంగా తీపి పదార్థాలు కనిపిస్తే ఆమడదూరం పరుగులు తీస్తుంటారు.
ఈ క్రమంలోనే చాలామందికి వచ్చే అతిపెద్ద సందేహం.. "షుగర్ వ్యాధిగ్రస్తులు తీయ్యగా ఉండే ఖర్జూరాలు (Dates) తినొచ్చా? తింటే షుగర్ లెవెల్స్ పెరుగుతాయా?" ఈ ప్రశ్నకు ఆరోగ్య నిపుణులు ఏమంటున్నారో, ఖర్జూరం తింటే శరీరంలో ఎలాంటి మార్పులు వస్తాయో ఇప్పుడు తెలుసుకుందాం.
నిరభ్యంతరంగా తినొచ్చు! అయితే, ఇక్కడే ఒక చిన్న షరతు ఉంది. వాటిని 'మితంగా' మాత్రమే తీసుకోవాలి. ఖర్జూరం తియ్యగా ఉన్నప్పటికీ, ఇందులో తక్కువ గ్లైసెమిక్ ఇండెక్స్ (Low GI) ఉంటుంది. దీనివల్ల ఖర్జూరాలు తిన్న వెంటనే రక్తంలో గ్లూకోజ్ స్థాయిలు అమాంతం పెరిగిపోవు.
ఖర్జూరం తింటే డయాబెటిక్స్కు కలిగే లాభాలు:
షుగర్ కంట్రోల్: ఖర్జూరాల్లో డైటరీ ఫైబర్ (పీచు పదార్థం) పుష్కలంగా ఉంటుంది. ఇది మనం తిన్న ఆహారం నెమ్మదిగా జీర్ణమయ్యేలా చేసి, రక్తంలో చక్కెర స్థాయిలు అకస్మాత్తుగా పెరగకుండా అడ్డుకుంటుంది.
పోషకాల గని: ఐరన్, కాల్షియం, మెగ్నీషియం, జింక్ వంటి ఖనిజాలతో పాటు విటమిన్ 'ఎ', 'కె', బి-కాంప్లెక్స్ విటమిన్లు ఇందులో మెండుగా ఉంటాయి.
బీపీకి చెక్: ఇందులో ఉండే మెగ్నీషియం, పొటాషియం రక్తపోటును (BP) అదుపులో ఉంచుతాయి.
గుండె పదిలం: ఖర్జూరాల్లో కొలెస్ట్రాల్ ఉండదు. పైగా ఇందులోని ఫైబర్ చెడు కొలెస్ట్రాల్ను తగ్గించి, గుండెను ఆరోగ్యంగా ఉంచుతుంది.
రోజుకు ఎన్ని ఖర్జూరాలు తినాలి?
అమృతమైనా మితంగానే తీసుకోవాలి కదా! డయాబెటిస్ ఉన్నవారు రోజుకు 2 లేదా 3 ఖర్జూరాలు మాత్రమే తినాలని నిపుణులు సూచిస్తున్నారు. ఇలా లిమిట్గా తినడం వల్ల డయాబెటిక్ పేషెంట్లలో తరచుగా వచ్చే అలసట, నీరసం దూరమై రోజంతా చురుకుగా, హుషారుగా ఉంటారు.
