ప్రస్తుత రోజుల్లో ఆరోగ్యంపై శ్రద్ధ పెరిగింది. అందుకే చాలామంది అన్నానికి ప్రత్యామ్నాయంగా సిరిధాన్యాలను (Millets) తమ డైట్లో భాగం చేసుకుంటున్నారు. అందులోనూ కొర్రలు (Foxtail Millets) బరువు తగ్గడానికి, బ్లడ్ షుగర్ లెవెల్స్ అదుపులో ఉంచడానికి అద్భుతంగా పనిచేస్తాయి.
అయితే, కొర్రలతో కేవలం సంగటి లేదా కిచిడీయే కాకుండా, ఎంతో రుచికరమైన వెజిటబుల్ పులావ్ కూడా చేసుకోవచ్చు. లంచ్ బాక్స్లోకి పర్ఫెక్ట్గా సరిపోయే ఈ హెల్తీ అండ్ టేస్టీ రెసిపీ తయారీ విధానం మీకోసం..
కొర్రలు: 1 కప్పు
మిశ్రమ కూరగాయ ముక్కలు: 1 కప్పు (క్యారెట్, బీన్స్, పచ్చి బఠానీలు, ఆలుగడ్డ)
ఉల్లిపాయ: 1 (సన్నగా తరిగినవి)
పచ్చిమిర్చి: 3 లేదా 4 (నిలువుగా చీల్చినవి)
అల్లం వెల్లుల్లి పేస్ట్: 1 స్పూన్
పుదీనా, కొత్తిమీర: గుప్పెడు
హోల్ గరం మసాలా: (బిర్యానీ ఆకు-1, లవంగాలు-4, యాలకులు-2, దాల్చిన చెక్క-చిన్న ముక్క)
నెయ్యి లేదా నూనె: 2 టేబుల్ స్పూన్లు
ఉప్పు: రుచికి సరిపడా
నీళ్లు: 2 కప్పులు
1. కొర్రలను నానబెట్టడం
మొదటగా కొర్రలను రెండు, మూడు సార్లు శుభ్రంగా కడిగి, కనీసం 4 నుండి 5 గంటల పాటు నీళ్లలో నానబెట్టుకోవాలి. సిరిధాన్యాలు బాగా నానితేనే మన శరీరానికి వాటిలోని పోషకాలు అందుతాయి, అలాగే జీర్ణం సులువవుతుంది.
2. పోపు మరియు మసాలా వేయడం
ఇప్పుడు స్టవ్ ఆన్ చేసి కుక్కర్ లేదా మందపాటి గిన్నె పెట్టి నెయ్యి లేదా నూనె వేయండి. నూనె వేడెక్కిన తర్వాత హోల్ గరం మసాలా దినుసులు వేసి వేయించాలి.
ఆ తర్వాత తరిగిన ఉల్లిపాయ ముక్కలు, పచ్చిమిర్చి, అల్లం వెల్లుల్లి పేస్ట్ వేసి పచ్చివాసన పోయే వరకు బాగా వేయించుకోవాలి.
3. వెజిటబుల్స్ కలపడం
ఇందులోనే పుదీనా, కొత్తిమీరతో పాటు కట్ చేసి పెట్టుకున్న క్యారెట్, బీన్స్, బఠానీ ముక్కలను వేసి ఒక రెండు నిమిషాల పాటు తక్కువ మంటపై మగ్గనివ్వాలి.
కూరగాయలు కొద్దిగా వేగిన తర్వాత, 1 కప్పు కొర్రలకు 2 కప్పుల చొప్పున నీళ్లు పోయాలి. ఇందులోనే రుచికి సరిపడా ఉప్పు వేసి నీటిని బాగా మరిగించాలి.
నీళ్లు మరుగుతున్నప్పుడు, ముందుగా నానబెట్టుకున్న కొర్రలను నీరు లేకుండా వడకట్టి ఇందులో వేయాలి. అంతా ఒకసారి కలిపి మూత పెట్టేయాలి. కుక్కర్ అయితే 2 విజిల్స్ రానివ్వాలి. సాధారణ గిన్నె అయితే సన్నని మంటపై నీరంతా ఇంకిపోయే వరకు ఉడికించుకోవాలి.
చిట్కా: కొర్రల పులావ్ మరింత పొడిపొడిగా రావాలంటే, వండిన వెంటనే కలపకుండా ఒక 10 నిమిషాల పాటు అలాగే వదిలేయండి. ఆ తర్వాత సర్వ్ చేసుకుంటే అన్నం ముద్ద అవ్వకుండా పర్ఫెక్ట్గా వస్తుంది.
వేడివేడి, సువాసనభరితమైన కొర్రల వెజిటబుల్ పులావ్ సిద్ధం! దీన్ని పెరుగు రైతాతో కలిపి తింటే రుచి అద్భుతంగా ఉంటుంది.
కొర్రలు తినడం వల్ల కలిగే ప్రయోజనాలు:
ఇందులో ఫైబర్ (పీచు పదార్థం) ఎక్కువగా ఉండటం వల్ల గుండె ఆరోగ్యానికి ఎంతో మంచిది.
బరువు తగ్గాలనుకునే వారికి ఇది ఒక బెస్ట్ డైట్ ఆప్షన్.
దీని గ్లైసిమిక్ ఇండెక్స్ తక్కువగా ఉండటం వల్ల డయాబెటిస్ ఉన్నవారికి ఇది అమృతంతో సమానం.
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
