కర్రీలకు అద్భుతమైన రుచిని అందించాలంటే అల్లం వెల్లుల్లి పేస్ట్ తప్పనిసరి. ఇది వంటలకు రుచిని జోడించడమే కాకుండా ఆరోగ్య ప్రయోజనాలను కూడా అందిస్తుంది. అయితే, కొందరు బయట కొనుగోలు చేసిన అల్లం వెల్లుల్లి పేస్ట్‌ను ఉపయోగిస్తారు, కానీ దీనివల్ల ఆరోగ్యానికి హాని కలుగుతుందని నిపుణులు హెచ్చరిస్తున్నారు. ఈ నష్టాల గురించి ఇప్పుడు తెలుసుకుందాం.
అల్లం వెల్లుల్లి పేస్ట్ ప్రతి వంటగదిలో తప్పక ఉంటుంది, ఎందుకంటే ఇది వంటకాలకు ప్రత్యేకమైన రుచిని అందిస్తుంది. ముఖ్యంగా నాన్-వెజ్ వంటకాలైన చికెన్, మటన్, ఫిష్ వంటివాటికి ఈ పేస్ట్ రుచిని నాలుగు రెట్లు పెంచుతుంది. అందుకే చాలా మంది ఇంట్లోనే ఈ పేస్ట్‌ను తయారు చేసి భద్రపరుచుకుంటారు.
అయితే, ఈ రోజుల్లో బిజీ షెడ్యూల్ కారణంగా కొందరు ఇంట్లో తయారు చేయకుండా మార్కెట్‌లో కొనుగోలు చేస్తున్నారు. కానీ, ఇలాంటి ప్యాక్ చేసిన పేస్ట్ ఆరోగ్యానికి హానికరమని నిపుణులు చెబుతున్నారు. ఎందుకంటే, మార్కెట్‌లో లభించే అల్లం వెల్లుల్లి పేస్ట్‌లో కల్తీ ఉండే అవకాశం ఎక్కువ. ఇది రుచిని తగ్గించడమే కాకుండా ఆరోగ్య సమస్యలకు కూడా దారితీస్తుంది.
సహజంగా ఇంట్లో తయారు చేసిన పేస్ట్ తాజాగా, రసాయనాలు లేకుండా ఉంటుంది. కానీ, బయట కొనే పేస్ట్‌లో రసాయనాలు, కృత్రిమ పదార్థాలు మిళితమవుతాయి. అందుకే, కొనుగోలు చేసేటప్పుడు కల్తీని గుర్తించడం ముఖ్యం. కల్తీ అల్లం వెల్లుల్లి పేస్ట్‌ను గుర్తించే విధానాలను ఇప్పుడు చూద్దాం.
తాజా అల్లం వెల్లుల్లి పేస్ట్ ఘాటైన వాసనతో, లేత గోధుమ రంగులో, మందంగా ఉంటుంది. కల్తీ పేస్ట్ పుల్లని వాసనతో, నీళ్లలా సన్నగా, ముదురు రంగులో ఉంటుంది. ప్యాకెట్‌పై అల్లం, వెల్లుల్లి కాకుండా నీరు, ఉప్పు వంటివి ఎక్కువగా రాసి ఉంటే, ఆ పేస్ట్‌ను కొనకపోవడమే మంచిది. ఈ జాగ్రత్తలతో కల్తీ పేస్ట్‌ను నివారించవచ్చని నిపుణులు సూచిస్తున్నారు.
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
