Farming Ideas:రూ.15 వేలు పెడితే.. లక్షల్లో ఆదాయం! కరవు సీమలో కాసుల వర్షం కురిపిస్తున్న ‘మ్యాజిక్’ పంట..
అనంతపురం జిల్లా అంటేనే కరవు కాటకాలు.. నీటి చుక్క కోసం ఆకాశం వంక చూడాల్సిన పరిస్థితి. వేరుశనగ వేసినా, ఇతర పంటలు వేసినా పెట్టుబడి కూడా రాని దుస్థితి.
కానీ, అదే అనంతపురం మట్టిలో ఓ రైతు ‘చియా’ (Chia Seeds) అనే కొత్త రకం పంటతో అద్భుతాలు సృష్టిస్తున్నాడు. కేవలం 3 నెలల్లోనే పెట్టిన పెట్టుబడికి 4 రెట్లు లాభం కళ్లజూస్తున్నాడు. ఆ సాగు వివరాలు, లాభాల లెక్కలు ఇవే!
పెట్టుబడి రూ.15 వేలు.. ఆదాయం రూ.1.80 లక్షలు!
తాడిపత్రి నియోజకవర్గం, యల్లనూరుకు చెందిన రైతు సాంబశివారెడ్డి కర్ణాటక రైతుల స్ఫూర్తితో ఈ సాగు మొదలుపెట్టారు. ఆయన అనుభవం ప్రకారం లెక్కలు ఇలా ఉన్నాయి:
పెట్టుబడి (ఎకరాకు): రూ. 15,000 మాత్రమే.
పంట కాలం: కేవలం 3 నెలలు.
దిగుబడి: ఎకరాకు 3 నుంచి 6 క్వింటాళ్లు.
మార్కెట్ ధర: ప్రస్తుతం కిలో చియా గింజలు రూ. 200 వరకు పలుకుతున్నాయి.
లాభం: సాంబశివారెడ్డి 3 ఎకరాల్లో సాగు చేశారు. రూ. 45 వేల పెట్టుబడి పెడితే.. చేతికి రూ. 1.80 లక్షల వరకు ఆదాయం వస్తుందని అంచనా. అంటే ఏకంగా 400% లాభం!
నీళ్లు తక్కువ.. డిమాండ్ ఎక్కువ.. మెక్సికో దేశానికి చెందిన ఈ చియా పంట అనంతపురం వాతావరణానికి పర్ఫెక్ట్ గా సెట్ అయ్యింది.
నీటి ఆదా: దీనికి పెద్దగా నీళ్లు అవసరం లేదు. తక్కువ నీటితోనే పండుతుంది.
చీడపీడలు లేవు: ఈ పంటకు తెగుళ్లు, పురుగుల బెడద చాలా తక్కువ. రసాయన మందులు కొట్టాల్సిన పనిలేదు.
సేంద్రియమే మేలు: సేంద్రియ ఎరువులు వాడితేనే దిగుబడి, క్వాలిటీ బాగుంటుందని అధికారులు చెబుతున్నారు.
ఎందుకు అంత రేటు?
చియా విత్తనాలకు ఇప్పుడు మార్కెట్లో ఫుల్ డిమాండ్ ఉంది. వీటిలో ఫైబర్, ఒమేగా-3 ఫ్యాటీ యాసిడ్స్ పుష్కలంగా ఉంటాయి. బరువు తగ్గాలనుకునేవారు, షుగర్ పేషెంట్లు వీటిని అమృతంలా భావిస్తారు. అందుకే సిటీల్లో వీటికి మంచి ధర లభిస్తోంది.
ముఖ్య గమనిక: వర్షాకాలం తప్ప ఏడాదిలో రెండు సార్లు (ముఖ్యంగా శీతాకాలంలో) ఈ పంట వేసుకోవచ్చు. నీటి ఎద్దడి ఉన్న ప్రాంతాలకు ఇది నిజంగానే ‘బంగారు పంట’.
గమనిక:వీటిని పాటించే ముందు తప్పకుండా నిపుణుల సలహా తీసుకోవాలి. ఈ వివరాలు కేవలం మీ అవగాహనకు మాత్రమే. ఇందులో పేర్కొన్న అంశాలకు 'telugulifestyle' బాధ్యత వహించదని గమనించగలరు.
