Summer Special Curry:మండే ఎండల్లో చల్లటి అమృతం.. స్టవ్తో పనేలేకుండా 5 నిమిషాల్లో చేసే సమ్మర్ స్పెషల్ కర్రీ!
వేసవికాలం వచ్చేసింది.. ఈ ఎండల్లో వంటింట్లో స్టవ్ ముందు నిలబడి వంట చేయాలంటేనే చెమటలు పట్టిపోతాయి. పైగా వేడి చేసే కూరలు తినాలంటే నోటికి రుచించవు. ఇలాంటి సమయంలో ఒంట్లో వేడిని తగ్గించి, కడుపుకు చల్లగా అనిపించే అద్భుతమైన రెసిపీ ఒకటుంది.
దీనికి గ్యాస్తో పెద్దగా పనే లేదు. ఉడకబెట్టాల్సిన అవసరం అసలే లేదు. కేవలం 5 నిమిషాల్లో అద్భుతమైన రుచితో ఈ సమ్మర్ స్పెషల్ 'పచ్చి పులుసు'ను ఎలా తయారు చేయాలో ఇప్పుడు చూద్దాం.
కావాల్సిన పదార్థాలు:
చింతపండు: నిమ్మకాయంత (పచ్చి చింతపండు అయితే ఇంకా మంచిది)
ఉల్లిపాయలు: 4 (పెద్దవి)
వెల్లుల్లి రెబ్బలు: 6
పచ్చిమిర్చి: 7
జీలకర్ర: 2 టేబుల్ స్పూన్లు
మిరియాలు: అర టేబుల్ స్పూన్
బెల్లం: కొద్దిగా (తురుము)
కొత్తిమీర, కరివేపాకు: తగినంత
ఉప్పు, పసుపు: రుచికి సరిపడా
తయారీ విధానం (సింపుల్ స్టెప్స్):
ముందుగా నిమ్మకాయంత చింతపండును శుభ్రంగా కడిగి 20 నిమిషాల పాటు నీళ్లలో నానబెట్టాలి. తర్వాత దాన్ని బాగా పిసికి, ఐదు సార్లు తగినన్ని నీళ్లు పోస్తూ పల్చటి రసం తీసి ఒక గిన్నెలో పక్కన పెట్టుకోవాలి.
ఇప్పుడు రోట్లో (లేదా గ్రైండర్లో) వెల్లుల్లి, జీలకర్ర, మిరియాలు, పచ్చిమిర్చి, ఉల్లిపాయ ముక్కలు, కొత్తిమీర, కరివేపాకు వేసి కచ్చాపచ్చాగా దంచుకోవాలి. (మెత్తని పేస్ట్లా చేయకూడదు).
ఈ దంచిన మసాలా మిశ్రమాన్ని ముందుగా తీసిపెట్టుకున్న చింతపండు రసంలో వేయాలి. అందులోనే రుచికి సరిపడా ఉప్పు, అర టీస్పూన్ పసుపు, కొద్దిగా బెల్లం తురుము వేసి చేత్తో బాగా మిక్స్ అయ్యేలా కలపాలి. (బెల్లం వేయడం వల్ల పులుపు బ్యాలెన్స్ అయ్యి రుచి అదిరిపోతుంది).
అసలు స్టవ్ వెలిగించకుండా అలాగే కూడా తినేయొచ్చు. కానీ మరింత రుచి కావాలనుకుంటే.. చిన్న పాన్ పెట్టి 3 టేబుల్ స్పూన్ల నూనె వేడి చేయాలి. అందులో ఆవాలు, జీలకర్ర, 4 ఎండుమిర్చి, కరివేపాకు, కొద్దిగా పసుపు వేసి తాలింపు పెట్టుకుని.. ఆ తాలింపును ఈ రసంలో కలుపుకోవాలి.
అంతే! నోటికి ఎంతో రుచిగా ఉండే చల్లటి పచ్చి పులుసు రెడీ. వేడి వేడి అన్నంలో ఇది కలుపుకుని తింటే.. ఈ సమ్మర్లో అమృతంలా అనిపిస్తుంది. పైగా ఇది త్వరగా అరిగిపోయి గ్యాస్ సమస్యలను దరిచేరనివ్వదు!
