పండుగలు, పూజలు వచ్చాయంటే నైవేద్యాల్లో పూర్ణం బూరెలు ఖచ్చితంగా ఉండాల్సిందే. కానీ చాలామందికి మినప్పప్పు నానబెట్టడం, రుబ్బడం పెద్ద పనిలా అనిపిస్తుంది. తీరా చేశాక నూనెలో పూర్ణం బయటకు రావడం లేదా బూరెలు మెత్తబడిపోవడం జరుగుతుంటుంది.
కానీ మినప్పప్పును నానబెట్టాల్సిన అవసరం లేకుండా, పిండిని రుబ్బే పని లేకుండా అప్పటికప్పుడు ఇన్స్టంట్గా ఎంతో సులువుగా పూర్ణం బూరెలు ఎలా చేసుకోవాలో ఈరోజు తెలుసుకుందాం. ఈ పద్ధతిలో చేస్తే బూరెలు గంటల తరబడి కరకరలాడుతూ, లోపల పూర్ణం ఎంతో సాఫ్ట్గా అమృతంలా కుదురుతాయి!
కావాల్సిన పదార్థాలు:
లోపల పూర్ణం కోసం:
పచ్చి శనగపప్పు – 1 కప్పు
బెల్లం తురుము – 1 కప్పు
నీళ్లు – 2 కప్పులు
యాలకుల పొడి – అర టీస్పూన్
నెయ్యి – 2 నుండి 3 టేబుల్ స్పూన్లు
పై పిండి (కోటింగ్) కోసం
మినపగుళ్లు – అర కప్పు
పొడి బియ్యప్పిండి – 1 కప్పు
బెల్లం తురుము – 2 టీస్పూన్లు (మంచి రంగు కోసం)
వంట సోడా – పావు టీస్పూన్
ఉప్పు – చిటికెడు
డీప్ ఫ్రైకి సరిపడా నూనె
1. ఇన్స్టంట్ పిండి తయారీ:
ముందుగా అర కప్పు మినపగుళ్లను మిక్సీ జార్లో వేసి మెత్తని పౌడర్లా గ్రైండ్ చేసి జల్లెడ పట్టుకోవాలి.
ఈ మినప్పిండిని ఒక బౌల్లోకి తీసుకుని, అందులో 1 కప్పు పొడి బియ్యప్పిండి వేసి కలపాలి.
ఇప్పుడు కొద్దికొద్దిగా నీళ్లు పోస్తూ ఉండలు లేకుండా దోశల పిండిలా చిక్కగా కలుపుకోవాలి.
ఇందులోనే చిటికెడు ఉప్పు, 2 టీస్పూన్ల బెల్లం వేసి కలిపి మూతపెట్టి ఒక గంట పాటు పక్కన ఉంచాలి (ఈ సమయంలో బెల్లం కరిగి పిండి చక్కగా సెట్ అవుతుంది).
2. పూర్ణం తయారీ:
పచ్చి శనగపప్పును శుభ్రంగా కడిగి అరగంట నుంచి గంటసేపు నానబెట్టాలి.
నానిన పప్పును కుక్కర్లో 2 కప్పుల నీళ్లు, అర టీస్పూన్ నెయ్యి వేసి 4–5 విజిల్స్ వచ్చేంత వరకు మెత్తగా ఉడికించాలి.
కుక్కర్ మూత తీసి పప్పును పప్పుగుత్తితో లేదా మ్యాషర్తో మెత్తగా మెదపాలి.
ఇప్పుడు లో-ఫ్లేమ్పై స్టవ్ మీద పెట్టి, 1 కప్పు బెల్లం తురుము వేసి కలపాలి. బెల్లం కరిగి కాసేపటికి పూర్ణం ముద్దలా గట్టిపడుతుంది.
చివరగా యాలకుల పొడి, నెయ్యి వేసి కలిపి స్టవ్ ఆఫ్ చేసి చల్లారనివ్వాలి.
చల్లారిన తర్వాత చేతికి నెయ్యి రాసుకుంటూ చిన్న చిన్న నిమ్మకాయ సైజు ఉండలుగా చేసుకోవాలి.
3. బూరెలు వేయడం:
నానబెట్టిన పిండిలో పావు టీస్పూన్ వంట సోడా వేసి మరొకసారి బాగా బీట్ చేస్తూ కలపాలి (స్పూన్ వెనుక వైపు కోట్ అయ్యేంత చిక్కగా ఉండాలి).
కడాయిలో డీప్ ఫ్రైకి సరిపడా నూనె వేడి చేయాలి.
తయారుచేసుకున్న పూర్ణం ఉండలను పిండిలో ముంచి, అన్ని వైపులా పిండి బాగా పట్టేలా చూసి చేతితో లేదా స్పూన్తో వేడి నూనెలో నెమ్మదిగా వేయాలి.
మంటను మీడియం ఫ్లేమ్లో ఉంచి, రెండు వైపులా మంచి గోల్డెన్ బ్రౌన్ కలర్ వచ్చి క్రిస్పీగా అయ్యేంత వరకు వేయించి తీయాలి.
చూశారు కదా! ఎలాంటి శ్రమ లేకుండా, మినప్పప్పు నానబెట్టకుండానే ఇన్స్టంట్గా పూర్ణం బూరెలు ఎంత సులభంగా చేసుకోవచ్చో! ఈ రాబోయే పండుగకు మీరు కూడా తప్పకుండా ఈ పద్ధతిలో ట్రై చేసి మీ అభిప్రాయాన్ని పంచుకోండి.
